Pasi presidenti francez Emmanuel Macron solli idenë e zgjerimit të koalicionit kundër ISIS-it për t’iu kundërvënë Hamasit, një zyrtar i Pallatit Elysee thotë në Jerusalem se Franca është në dispozicion “për të forcuar atë që po bëjmë në koalicionin kundër ISIS”.
Lajmi u bë i ditur nga agjencia “The Times of Israel”.
“Ne jemi në dispozicion për të përfshirë Hamasin në koalicionin kundër ISIS-it, në varësi të asaj që Izraeli do të na kërkojë të japim”, shtoi ai.
Sipas zyrtarit francez, jo çdo vend po lufton në terren.
“Shumë do të varet nga bisedat që do të kemi me aleatët tanë”, mendon zyrtari i Elysee-s.
Në të njëjtën kohë, zyrtari nuk përjashton mundësinë e bashkëpunimit ushtarak kundër Hamasit apo vendosjes së trupave franceze në terren.
Zyrtari thekson gjithashtu nevojën për të menduar përpara për rifillimin e një “procesi paqeje më vendimtar”.
“Nëse doni të luftoni në mënyrë efektive dhe nëse doni të keni të gjithë me vete, duhet të ofroni një perspektivë politike”, vazhdon zyrtari. “Ne duhet të dimë plotësisht pse po luftojmë”.
Ai theksoi se kauza për të cilën po lufton Izraeli është edhe “kauza jonë”.
Zyrtari thotë se Macron i kërkoi kryeministrit Benjamin Netanyahu “qartësi në lidhje me fundin e lojës, modalitetet me të cilat vepron, kushtet që krijon, motivimin tuaj politik”.
Ai shton se Franca dëshiron të “konsolidojë perspektivën e një armëpushimi”.
“E di që është shumë delikate të diskutohet. Por ne duhet të dimë përsëri se ku do të kemi instrumentet në dispozicion që mund të rikthejnë paqen dhe stabilitetin”, ravijëzoi zyrtari francez.
Sipas tij, prioritet kyç mbetet lirimi i pengjeve.
“Ne jemi duke eksploruar çdo opsion dhe besojmë se është shumë e rëndësishme ta bëjmë atë me Izraelin”, mendon ai sakaq.
Franca humbi 30 qytetarë në sulmin e Hamasit dhe nëntë janë të zhdukur.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
