Ulen eksportet dhe importet për herë të parë që nga nisja e luftës në Ukrainë

Në muajin mars të këtij viti, eksportet e mallrave në Shqipëri janë ulur për herë të parë që nga nisja e luftës në Ukrainë.

Të dhënat nga Instituti i Statistikave tregojnë se vlera e mallrave të shitur jashtë, muajin e kaluar, ra në 42.1 miliardë lekë nga 47.7 miliardë vitin e shkuar, duke u tkurrur me 11.7 për qind.

Sakaq, në rënien e eksporteve ndikim kanë pasur materialet e ndërtimit, metalet, mineralet, lëndët djegëse, veçanërisht energjia elektrike dhe materialet plastike.

Edhe ushqimet e pijet apo tekstilet shfaqën në mars shenja stanjacioni.

Pjesa më e madhe e këtyre produkteve rezulton të ketë shkuar drejt Spanjës, vend me të cilin eksportet u zgjeruan me 170 për qind muajin e kaluar.

Ndërkohë, vendi ndiqet nga Greqia me 28 dhe Kosova me 2 për qind. Ndërkohë kanë rënë eksportet e Kroacisë, Gjermanisë dhe Italisë.

Në linjë të ngjashme kanë ecur edhe importet.

Vlera e mallrave të blerë nga jashtë, muajin e shkuar, ra në 80.5 miliardë lekë nga 83.6 miliardë marsin e vitit 2022 duke u tkurrur me 3.7 për qind.

Rënia e eksporteve me importet ende në nivelet më të lara historike zgjeruan në 38.4 miliardë lekë deficitin tregtar të Shqipërisë në drejtim të tregtisë së jashtme gjatë marsit.

Ndërkaq, ekspertët e lidhin rënien e eksporteve me çmimet e larta, por edhe me reduktimin e fuqisë blerëse.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.