Bota është më afër shkatërrimit se kurrë më parë, sipas Doomsday Clock ose të ashtuquajturës “Ora e Kijametit”.
Ora – një reflektim se sa afër shkatërrimit është njerëzimi, dhe e vendosur nga ekspertë dhe shkencëtarë – u zhvendos 10 sekonda përpara, në 90 sekonda deri në mesnatë.
Kërcënimi i luftës bërthamore dhe problemeve të tjera është rritur vitin e fundit, sipas Buletinit të Shkencëtarëve Atomik, i cili menaxhon Orën e Kijametit dhe vendos kohën e tij.
Ai vuri në dukje veçanërisht luftën e vazhdueshme në Ukrainë, për të cilën tha se e kishte paralajmëruar në janar të vitit 2022, kur përditësoi për herë të fundit orën.
Më pas, ai qëndroi në 100 sekonda deri në mesnatë, siç ka qenë që nga viti 2019 – por paralajmëroi se rritja e dhunës midis Ukrainës dhe Rusisë mund ta shtyjë botën më pranë apokalipsit.
“Këtë vit, Bordi i Shkencës dhe Sigurisë i Buletinit të Shkencëtarëve Atomikë i lëvizi akrepat e Orës së Kijametit përpara, kryesisht (megjithëse jo ekskluzivisht) për shkak të rreziqeve në rritje të luftës në Ukrainë”, thuhet në deklaratën e Buletinit. “Ora tani qëndron në 90 sekonda deri në mesnatë – më pranë se kurrë katastrofës globale”.
Kjo deklaratë u botua në anglisht, ukrainisht dhe rusisht për herë të parë, me shpresën se paralajmërimi do të merrej parasysh në kryeqytetet e përfshira në luftë, tha Rachel Bronson, shefja ekzekutive e Buletinit.
Pothuajse e gjithë deklarata e Buletinit vuri në dukje kërcënimin e luftës bërthamore, kryesisht për shkak të dhunës në Ukrainë, por edhe gjetkë.
Megjithatë, njoftimi deklaroi se kishte kërcënime të vazhdueshme nga ndryshimet klimatike, kërcënimet biologjike dhe teknologjitë shkatërruese.
COVID-19 tregoi se sa rrezikohet popullata njerëzore nga pandemitë, për shembull, dhe shpërthime të tilla ka të ngjarë të bëhen shumë më të zakonshme, paralajmëruan ekspertët.
Kur ora u zhvendos në 100 sekonda deri në mesnatë, në vitin 2019, ishte tashmë më afër mesnatës që kishte qenë ndonjëherë më parë.
Ajo shënoi herën e parë që ora ishte vendosur në sekonda, një reflektim i rrezikut në rritje.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
