Rama quan humbjen e burimeve njerëzore si “sfidën e sfidave”

Kryeministri i Shqipërisë, Edi Rama, deklaroi se dëshira dhe synimi i të rinjve “që kanë një sy për t’u larguar” është “sfida e sfidave”.

Lajmi u bë i ditur gjatë analizës së punës së bashkisë Tiranë.

“Largimi i të rinjve është sfida e sfidave, tejkalon forcat dhe mundësitë e një pjesë cilado qoftë kjo pjesë e organizimit tërësor të shoqërisë dhe shtetit. Ky është momenti më kritik i këtyre transformimeve që të gjitha palët (sektori publik dhe sektori privat – Ed) të bëhen bashkë”, theksoi kreu i Qeverisë.

Sipas tij, palët janë në një fazë ku me patjetër duhet të synohet me këmbëngulje dhe kurajo rritja e vazhdueshme e pagave.

“Jemi në një fazë ku duhet ta konsiderojmë këtë vit dhe vitet që vijnë si kohën maksimale që kemi për të kapërcyer hendekun që rrezikon të bëhet i pakapërcyeshëm. Ne kemi detyrën dhe mundësinë që të hyjmë në një ndërveprim më intensiv mes palëve në të gjitha fushat e jetës, të marrin atë që është maksimumi i mundshëm i këtij vendi”, shtoi Rama.

Ai u bëri thirrje sipërmarrjeve private që duhet të bëjnë një reflektim pa humbur kohë, sepse “duke shtrënguar dorën më shumë se sa duhet dhe duke i lënë pagat në fund për të punësuarit e vet, i kanë hapur vetes një gropë që do të bëhet e pambyllshme për disa vite”.

Kjo, si rezultat i humbjes së kapitalit (burimit) njerëzor.

Më 6 mars, kryeministri solli po ashtu në vëmendje fenomenin e largimit të mjekëve dhe infermierëve shqiptarë drejt Gjermanisë gjatë fjalës së tij në “Kongresin e Shëndetësisë”.

“Sot studentët e Mjekësisë paguajnë 1/16-ën e kostos reale (të studimeve). Shteti e bën për një sërë faktorësh që nuk kam arsye përse t’i rendis këtu. Shteti dhe taksapaguesit shqiptarë nuk e bëjnë këtë që ditën që mbarojnë studimet dhe marrin diplomën e mjekut, ata të cilët financohen nga ky buxhet dhe kjo sakrificë, të ikin dhe të shërbejnë në Gjermani”, u shpreh fillimisht kreu i Qeverisë.

Sipas tij, shteti shqiptar nuk financon studimet për sistemin shëndetësor gjerman.

“Ky është një problem të cilin shumë vende e kanë adresuar dhe ne ka ardhur koha ta adresojmë”, theksoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.