Kur blini një kuti qumështi, mund të vini re se disa marka thonë në pjesën e përparme të etiketës se përmbajnë vitaminë D.
Në realitet, pothuajse i gjithë qumështi i lopës i pasterizuar, si dhe shumë lloje të alternativave të qumështit, kanë vitaminë D të shtuar. Kërkohet të jetë e shënuar në etiketën e përbërësve, por jo domosdoshmërish në pjesën e përparme të kutisë.
Vitamina D ka shumë përfitime të rëndësishme shëndetësore, dhe pirja e qumështit të pasuruar me vitaminë D është një mënyrë e thjeshtë për të ndihmuar në plotësimin e nevojave tuaja.
Nevojat për vitaminë D
Vlera ditore e rekomanduar (DV) për vitaminën D është 800 njësi ndërkombëtare (IU), ose 20 mcg në ditë për të gjithë të rriturit dhe fëmijët mbi 4 vjeç. Për fëmijët e moshës 1-3 vjeç, është 600 IU ose 15 mcg në ditë.
Me përjashtim të peshkut yndyror si salmoni, i cili përmban 447 IU në një porcion 85 gram, shumë pak ushqime janë burime të mira të vitaminës D. Në vend të kësaj, shumica e vitaminës D prodhohet në trupin tuaj kur lëkura juaj është e ekspozuar ndaj diellit.
Shumë njerëz nuk i përmbushin rekomandimet për vitaminën D. Në fakt, një studim zbuloi se 25 përqind e kanadezëve nuk i plotësojnë nevojat e tyre vetëm përmes dietës.
Njerëzit që jetojnë në gjerësi veriore ku rrezet e diellit janë të kufizuara në dimër, si dhe ata që nuk kalojnë shumë kohë në diell, shpesh kanë nivele më të ulëta të vitaminës D në gjak.
Faktorë të tjerë, të tillë si obeziteti ose nënpesha, të qenit fizikisht joaktiv dhe të kesh mutacione të caktuara gjenetike, gjithashtu mund t’ju vënë në rrezik për të pasur nivele më të ulëta të vitaminës D.
Marrja e një suplementi dhe përdorimi i ushqimeve të fortifikuara si qumështi me vitaminë D janë mënyra të mira për të rritur marrjen dhe nivelet e gjakut të vitaminës D.
Pse qumështi ka vitaminë D të shtuar?
Në disa vende, përfshirë Kanadanë dhe Suedinë, vitamina D i shtohet qumështit të lopës me ligj. Në Shtetet e Bashkuara, nuk është i detyrueshëm, por shumica e prodhuesve të qumështit e shtojnë atë vullnetarisht gjatë përpunimit të qumështit.
Është shtuar në qumështin e lopës që nga vitet 1930 kur praktika u zbatua si një iniciativë e shëndetit publik për të reduktuar rakitin, i cili shkakton zhvillim të dobët të kockave dhe deformime te fëmijët.
Ndërsa qumështi nuk përmban natyrshëm vitaminë D, ai është një burim i mirë i kalciumit. Këto dy lëndë ushqyese funksionojnë mirë së bashku, pasi vitamina D ndihmon përthithjen e kalciumit në kockat tuaja, duke ndihmuar kështu në forcimin e tyre.
Kombinimi i kalciumit dhe vitaminës D gjithashtu ndihmon në parandalimin dhe trajtimin e osteomalacisë, ose kockave të buta, e cila shoqëron rakitin dhe mund të prekë të rriturit e moshuar.
Administrata e Ushqimit dhe Barnave (FDA) i lejon prodhuesit të shtojnë deri në 84 IU për 100 gram vitaminë D3 në qumështin e lopës dhe 84 IU për 100 gram vitaminë D2 në alternativat e qumështit me bazë bimore.
Pirja e qumështit me vitaminë D rrit sasinë e vitaminës D që njerëzit marrin dhe përmirëson nivelet e vitaminës D në gjak.
Studimet në Finlandë, ku qumështi me vitaminë D ka qenë i detyrueshëm që nga viti 2003, zbuluan se 91 përqind e atyre që pinin qumësht kishin nivele të vitaminës D në ose mbi 20 ng/ml, që konsiderohet e mjaftueshme sipas Institutit të Mjekësisë.
Përpara ligjit të fortifikimit, vetëm 44 përqind kishin nivele optimale të vitaminës D
Përfitimet e vitaminës D
Pirja e qumështit që përmban kalcium dhe vitaminë D rekomandohet si një mënyrë për të forcuar kockat tuaja dhe për të parandaluar rakitin dhe osteomalacinë.
Megjithatë, studimet e mëdha nuk tregojnë se ajo ndihmon në parandalimin e osteoporozës, e cila karakterizohet nga një hollim i kockave, ose fraktura të kockave tek të rriturit e moshuar.
Mund të zvogëlojë rrezikun e sëmundjeve të zemrës
Një faktor kryesor rreziku për sëmundjet e zemrës është një grup kushtesh të njohura si sindroma metabolike. Ai përfshin presionin e lartë të gjakut, rezistencën ndaj insulinës, peshën e tepërt të barkut, trigliceridet e larta dhe kolesterolin e ulët HDL (të mirë).
Njerëzit që kanë nivele më të larta të vitaminës D priren të kenë sindromë metabolike më pak të rëndë dhe një rrezik më të ulët të sëmundjeve të zemrës.
Për më tepër, nivelet më të larta të vitaminës D janë të lidhura me enët e gjakut më të shëndetshme.
Mund të zvogëlojë rrezikun e kancerit
Për shkak se vitamina D luan një rol të madh në ndarjen, zhvillimin dhe rritjen e shëndetshme të qelizave, mendohet se mund të luajë një rol edhe në parandalimin e rritjes së qelizave kancerogjene.
Hulumtimet që analizuan nivelet e vitaminës D dhe rrezikun e kancerit në 2 mijë e 300 gra mbi moshën 55 vjeç zbuluan se nivelet e gjakut mbi 40 ng/ml ishin të lidhura me një rrezik 67% më të ulët të të gjitha llojeve të kancerit.
Për më tepër, shkencëtarët australianë që ndoqën 3800 të rritur për 20 vjet gjetën të njëjtin përfitim për kancerin e gjirit dhe zorrës së trashë, por jo të gjitha llojet e kancerit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
