“Qendra e të dhënave e TikTok-ut po kufizon energjinë për prodhimin e municioneve në Ukrainë”

Një nga prodhuesit më të mëdhenj të municioneve në Evropë ka thënë se përpjekjet për të përmbushur kërkesën në rritje nga lufta në Ukrainë janë penguar nga një qendër e re e të dhënave e TikTok-ut që po monopolizon energjinë elektrike në rajon afër fabrikës së saj më të madhe.

Shefi ekzekutiv i Nammo-s, i cili është në bashkëpronësi nga qeveria norvegjeze, ka thënë se një zgjerim i planifikuar i fabrikës së saj më të madhe në Norvegjinë qendrore goditi një pengesë për shkak të mungesës së energjisë së tepërt, me ndërtimin e qendrës së re të të dhënave të TikTok-ut duke përdorur energjinë elektrike në zonën lokale.

“Ne jemi të shqetësuar sepse shohim se rritja jonë e ardhshme sfidohet nga ruajtja e videove”, ka thënë Morten Brandtzæg për Financial Times.

Sipas tij, kërkesa për raketa artilerie është 15 herë më e lartë se normalja dhe industria evropiane e municioneve duhet të investojë dy miliardë euro në fabrika të reja për të vazhduar me nevojat e Ukrainës.

Ukraina, referuar disa vlerësimeve, po gjuan  gjashtë mijë deri në shtatë mijë predha artilerie në ditë dhe po përballet me mungesë municioni pas më shumë se një viti lufte.

Udhëheqësit e Bashkimit Evropian kanë njoftuar një program për rimbursimin e vendeve që ofrojnë municion artilerie në Ukrainë nga një fond prej një miliardë eurosh, teksa shpenzojnë një miliardë euro shtesë për rritjen e kapacitetit të prodhimit të municioneve në të gjithë bllokun.

Por planet e Nammo-s për të zgjeruar objektin më të madh të prodhimit duket se kanë kundërshtuar përpjekjet e TikTok-ut për të përmirësuar imazhin përballë një numri në rritje të ndalimeve në të gjithë botën, duke strehuar të dhënat e evropianëve më shumë në nivel lokal.

TikTok-u po lufton një ndalim kombëtar të propozuar në SHBA, ku tashmë është ndaluar në shumicën e pajisjeve qeveritare.

Qeveria e Mbretërisë së Bashkuar, Komisioni Evropian dhe Parlamenti Evropian gjithashtu kohët e fundit ndaluan TikTok-un nga telefonat e stafit për shkak të shqetësimeve se të dhënat e përdoruesve që i përkasin kompanisë – e cila është në pronësi të firmës kineze ByteDance – mund të mblidhen nga qeveria e Kinës.

TikTok-u ka thënë vitin e kaluar se disa punonjës në Kinë mund të aksesonin të dhënat e përdoruesve evropianë dhe ka pranuar se punonjësit kishin përdorur aplikacionin për të spiunuar gazetarët në një përpjekje për të gjurmuar rrjedhjet.

Megjithatë, në një seancë dëgjimore në Kongres javën e kaluar, shefi ekzekutiv i kompanisë këmbënguli se TikTok-u ishte tërësisht i pavarur nga qeveria kineze dhe se autoritetet kineze nuk kishin akses në të dhënat e saj.

Megjithatë, në një përpjekje për të qetësuar ligjvënësit evropianë, TikTok-u ka thënë se do të fillojë të ruajë të dhënat e përdoruesve evropianë në nivel lokal këtë vit.

Dhe se do të reduktojë transferimin e të dhënave jashtë rajonit dhe do të reduktojë aksesin e punonjësve në të dhënat e përdoruesit nga brenda.

Kompania ka njoftuar tanimë planet për të hapur qendra të reja të dhënash në Irlandë dhe në rajonin Hamar të Norvegjisë.

Kompanitë ndërkombëtare të teknologjisë dhe mediave sociale po përballen me një kontroll të shtuar mbi funksionimin e tyre të qendrave të mëdha që përdoren për të ruajtur sasi të mëdha të dhënash.

Këto qendra konsumojnë sasi të mëdha energjie për të fuqizuar dhe për të ftohur serverët që ruajnë fotografitë, videot dhe të dhënat e tjera të bazuara në cloud-in kompjuterik të klientëve.

Deri në vitin 2030, Komisioni Evropian vlerëson se qendrat e të dhënave do të përbëjnë 3.2 për qind të kërkesës për energji elektrike brenda bllokut, një rritje prej 18.5 për qind nga viti 2018.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.