Policia rrethon shtëpinë e ish-udhëheqësit të Hondurasit, kërkohet ekstradimi i tij në SHBA për trafik droge

Policia në kryeqytetin e Hondurasit, Tegucigalpa, ka rrethuar shtëpinë e ish-presidentit Juan Orlando Hernández.

Oficerët u vendosën disa orë pasi SHBA-të kërkuan ekstradimin e tij për akuzat e drogës, të cilat ai i mohon.

Ministri i Sigurisë së Hondurasit tha se Hernández ishte brenda shtëpisë së tij dhe se policisë i ishte thënë ta rrethonte atë për të “parandaluar një arratisje”, ndërsa prisnin që të lëshohej një urdhër-arresti.

Hernandez qeverisi Hondurasin nga viti 2014 deri në janar të këtij viti.

Ai akuzohet se ka qenë i përfshirë në një rrjet të trafikut të drogës ku përfshihej vëllai i tij më i vogël, Tony Hernández, i cili vitin e kaluar u dënua me burgim të përjetshëm në SHBA.

Gjatë gjyqit të Tony Hernández, prokurorët pretenduan se bosi famëkeq meksikan i drogës Joaquín “El Chapo” Guzmán i kishte dorëzuar personalisht Tony Hernández 1 milion dollarë.

Sipas prokurorëve, “El Chapo” Guzmán i tha të riut Hernández që t’ia kalonte paratë vëllait të tij, Juan Orlando si ryshfet.

Hondurasi ka qenë prej vitesh një vend kryesor transiti për drogën e kontrabanduar nga Amerika e Jugut në Shtetet e Bashkuara dhe, së fundmi, është bërë gjithashtu një vend ku prodhohet kokaina.

Juan Orlando Hernández ka pohuar gjithmonë se ai bëri gjithçka në fuqinë e tij për të luftuar trafikun e drogës dhe gjatë administratës së ish-presidentit republikan të SHBA-ve Donald Trump, ai gëzonte mbështetjen e qeverisë amerikane.

Por, marrëdhënia e tij me SHBA-të u përkeqësua nën udhëheqjen e Presidentit demokrat, Joe Biden.

Javën e kaluar, Departamenti Amerikan i Shtetit zbuloi se Hernández ishte shtuar në listën e personave të ndaluar të hynin në SHBA, për shkak të aktiviteteve të supozuara korruptive.

The United States is advancing transparency and accountability in Central America by making public visa restrictions against Honduras’ former president, Juan Orlando Hernandez, on account of corrupt actions. No one is above the law.

— Secretary Antony Blinken (@SecBlinken) February 7, 2022

Në një deklaratë, Sekretari Amerikan i Shtetit, Antony Blinken, tha se kishte raporte “të besueshme” se ish-udhëheqësi i Hondurasit ishte “angazhuar në korrupsion të konsiderueshëm duke kryer ose lehtësuar akte korrupsioni dhe narkotrafiku, dhe duke përdorur të ardhurat e aktivitetit të paligjshëm për të lehtësuar fushata politike”.

Hernández iu përgjigj vërejtjeve të Blinken-it duke thënë se akuzat kundër tij bazoheshin te deklaratat e dhëna nga trafikantët e dënuar të drogës, të cilat ai thotë se ishin për hakmarrje.

Ndërsa Hernández ende nuk i është përgjigjur kërkesës së SHBA-ve për ekstradim, avokati i tij tha se ai kishte imunitet nga arrestimi për shkak të anëtarësimit të tij në Parlamentin e Amerikës Qendrore.

Ekspertët juridikë thonë se imuniteti i dhënë nga organi rajonal mund të hiqet nëse e kërkon shteti i origjinës së anëtarit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.