OKB-ja thotë se i është dashur të ndalojë lëvizjen e ndihmave dhe punonjësve të ndihmës brenda Gazës për shkak të një urdhri të ri izraelit për evakuimin e zonës Deir al-Balah, e cila ishte bërë një qendër për stafin e saj.
Një zyrtar i lartë i OKB-së kishte thënë më herët se operacionet e OKB-së ishin ndalur plotësisht brenda Rripit të Gazës, por zyrtarët më vonë sqaruan se operacionet me popullsinë lokale do të vazhdonin.
Sipas zyrtarit, OKB kishte zhvendosur shumicën e personelit të saj në operacionet në Deir al-Balah pas një urdhri evakuimi të Rafah disa muaj më parë.
Ushtria izraelite tha të hënën se po synonte “operativë terroristë” në Deir al-Balah dhe po punonte për të çmontuar “infrastrukturën” e mbetur të Hamasit, sulmi i të cilit më 7 tetor në Izraelin jugor shkaktoi luftën në Gaza.
Ushtria izraelite u ka thënë njerëzve që të evakuohen menjëherë.
Sipas agjencisë humanitare të OKB-së (OCHA), u prekën 15 ambiente ku strehoheshin punonjësit e ndihmës dhe katër magazina brenda ose afër zonës së urdhëruar për evakuim.
Pasi u duk se OKB-ja kishte mbyllur operacionet e saj në Gaza, Stéphane Dujarric, zëdhënës i sekretarit të përgjithshëm António Guterres, sqaroi se agjencia e OKB-së për refugjatët palestinezë po vazhdonte operacionet, edhe pse nën kufizime.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
