Kryeministri indian, Narendra Modi, ka thyer heshtjen disamujore për konfliktin vdekjeprurës etnik që shpërtheu në shtetin e Manipur.
E gjitha pasi u shfaq një video me përmbajtje sensitive, përpara se të pretendohej se ato ishin përdhunuar në grup.
Zemërimi shpërtheu në të gjithë Indinë pasi u shpërndanë pamjet ku dy gra nga fisi i pakicës Kuki u zhveshën me forcë lakuriq nga një turmë e grupit fisnor me shumicë Meitei thërrisnin: “Nëse nuk i hiqni rrobat, do t’ju vrasim”.
Gratë më pas tërhiqen zvarrë në një fushë, ku dyshohet se janë përdhunuar në grup.
Ngjarja e tmerrshme ka ndodhur në fillim të majit dhe megjithëse u regjistrua në polici, vetëm të enjten u bë një arrestim, një ditë pasi video u bë virale.
Një nga viktimat ka pretenduar se policia i kishte lënë gratë në duart e turmës.
Duke folur në seancën e hapjes së parlamentit të enjten, Modi bëri komentet e tij të para për konfliktin që po zhvillohet midis fisit Meitei dhe fisit Kuki.
Ai deklaroi se i gjithë vendi është turpëruar nga sulmi ndaj grave.
“Dua të siguroj kombin se asnjë fajtor nuk do të kursehet”, ka thënë ai.
“Do të veprohet sipas ligjit. Ajo që ndodhi me vajzat e Manipurit nuk mund të falet kurrë. Ndërsa qëndroj pranë këtij tempulli të demokracisë, zemra ime është e mbushur me dhimbje dhe zemërim”, ka shtuar ai.
Modi është kritikuar se ka mbetur publikisht i heshtur për konfliktin, i cili shpërtheu midis komuniteteve fisnore në fillim të majit dhe që atëherë ka vrarë mbi 140 njerëz, kryesisht ata nga komuniteti i pakicës Kuki.
Tani Manipur është i ndarë në thelb në vija etnike, me komunitetin Meitei në luginë dhe komunitetin Kuki që kontrollon kodrat.
Të dyja palët kanë mbledhur forca civile që vazhdojnë të përleshen dhunshëm me mijëra armë të vjedhura, ndërsa fshatrat janë djegur deri në themel dhe mbi 60 mijë njerëz janë zhvendosur.
Mijëra forca të armatosura indiane janë vendosur në shtet për të ruajtur qetësinë, por minoriteti Kuki thotë se po lufton për një shtet të pavarur.
Një nga viktimat në video ka thënë se ishte traumatizuar nga ngjarjet që ndodhën.
Ajo përshkroi se si ajo dhe katër të tjera ishin larguar nga fshati i tyre, i cili ishte plaçkitur dhe djegur nga një turmë Meitei, kur u sulmuan nga një bandë tjetër Meitei, e cila më pas vrau dy anëtarë të grupit të tyre.
“Më morën mua dhe një vajzë tjetër”, ka treguar ajo.
“Na rrethuan dhe na thanë të hiqnim të gjitha rrobat. Unë u përpoqa tu lutesha që të na linin vetëm, por ata na paralajmëruan se do të vriteshim si fqinjët tanë nëse nuk u bindemi atyre”.
“Unë bëra atë që më thanë, ata ishin gati të na vrisnin. Më pas na parakaluan. Burrat më preknin gjoksin dhe gjithë trupin tim”.
“Ne u çuam në një fushë aty pranë. Nuk dua të futem në detaje, por pas kësaj më lanë të lirë”.
Videoja tërhoqi kritika të ashpra nga Gjykata e Lartë, e cila e quajti atë thellësisht shqetësuese dhe një “dështim të madh kushtetues”.
Shefi i drejtësisë së Indisë, Dhananjaya Chandrachud, duket se kritikoi qeverinë për dështimin për të vënë nën kontroll situatën në Manipur.
“Mendoj se është koha që qeveria të ndërhyjë me të vërtetë dhe të marrë masa sepse kjo është thjesht e papranueshme”, ka thënë ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
