Italia ka rifutur kontrollet në kufirin me Slloveninë.
Pezullimi i Shengenit “ishte i nevojshëm për shkak të përkeqësimit të situatës në Lindjen e Mesme, rritjes së flukseve migratore përgjatë rrugës ballkanike dhe mbi të gjitha për çështjet e sigurisë kombëtare dhe unë marr përgjegjësinë e plotë për këtë”.
Kështu e ka shpjeguar lëvizjen kryeministrja italiane Giorgia Meloni.
Që nga fillimi i vitit, në Friuli-Venezia Giulia, 16 mijë persona janë identifikuar që kanë hyrë ilegalisht në territorin kombëtar.
Sakaq, vendimi i Romës vjen dy ditë pas sulmit terrorist në Bruksel, në një kohë tensioni të lartë në Evropë.
Në Francë, të paktën dhjetë aeroporte u evakuuan pas “kërcënimeve me bombë” të marra me email dhe për herë të tretë në pesë ditë nga Pallati i Versajës.
Aeroportet e Lille, Lion, Nantes, Nice, Toulouse, Strasburg dhe Beauvais, janë në pikëpyetje.
Në Belgjikë, aeroporti i Ostendit u evakuua për shkak të një “kërcënimi me bombë”.
Qeveria italiane ia ka komunikuar vendimin Komisionit Evropian dhe shteteve sipas praktikës.
Kështu, kontrollet do të rifuten nga e shtuna deri më 30 tetor me mundësi zgjatjeje.
11 vende në zonën Shengen kanë rifutur kontrollet kufitare: përveç Italisë, ka edhe Austria, Gjermania, Franca, Republika Çeke, Polonia, Sllovakia, Suedia, Danimarka dhe Norvegjia dhe Sllovenia.
Ndërkohë, Gjermania do ta mbajë masën deri më 25 tetor në kufijtë me Poloninë, Republikën Çeke dhe Zvicrën dhe me Austrinë deri më 11 maj 2024.
Edhe Franca ka rifutur kontrollet në të gjithë kufijtë e saj deri më 30 prill për shkak të kërcënimeve terroriste dhe situatës në kufijtë e jashtëm.
Pasojat e konfliktit në Lindjen e Mesme në sigurinë evropiane do të diskutohen nga 27 Ministrat e Brendshëm, të cilët takohen në Luksemburg.
Tema tjetër qendrore është ajo e riatdhesimeve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
