Ministri i Mbrojtjes, Ejup Maqedonci, deklaroi për Radio Televizionin e Kosovës (RTK) të martën se synimi kryesor i vendit të vogël ballkanik është anëtarësimi i Kosovës në NATO, derisa shtoi Forca e Sigurisë së Kosovës (RTK) është duke u zhvilluar si një forcë profesionale e demokratike, që mbikqyret nga autoritetet civile dhe nuk paraqet kërcënim për askënd.
“Kosova është e vendosur që të anëtarësohet në NATO. Jemi duke ndërtuar Ministrinë e Mbrojtjes dhe FSK-në sipas standardeve të NATO-s. Jemi duke ndërtuar një forcë që synon të jetë pjesë e integruar e NATO-s dhe si e tillë orientohet në aktivitetet që ndërlidhen me aktivitetet që zhvillohen edhe në vendet e NATO-s”, theksoi ndër të tjera ministri kosovar i Mbrojtjes.
Institucionet e Kosovës duan t’iu bashkohen strukturave të NATO-s, duke filluar nga programi i Partneritetit për Paqe (PfP) të NATO-s. Megjithatë, vendimet në aleancën më të suksesshme ushtarake në botë, përfshirë edhe PfP-në, që vlerësohet të jetë paradhomë e NATO-s, merren me konsensus nga Këshilli i Atlantikut – trupi vendimmarrës i aleancës veriatlantike.
Duke qenë se brenda NATO-s janë katër shtete mosnjohëse – Spanja, Greqia, Rumania dhe Sllovakia – atëherë rruga e vendit të vogël drejt përmbushjes së këtij synimi madhor vlerësohet tejet e vështirë. Por, avancimi i statusit së Kosovës në Asamblenë Parlamentare të NATO-s konsiderohet të jetë koha e duhur edhe për rihapjen e debatit për anëtarësimin e Kosovës në PfP.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
