Krahu ekzekutiv i Bashkimit Evropian (BE) parashikoi se ekonomia gjermane do të tkurret me 0.4 për qind në vitin 2023, krahasuar me një parashikim të mëparshëm prej 0.2 për qind rritje.
Gjermania përballet me recesion në sektorin e saj të madh industrial dhe një performancë të dobët në eksporte, të cilat të dyja kanë ndikime të rëndësishme për të gjithë ekonominë.
Në raportin e tij, Komisioni Evropian (KE) vuri në dukje dobësinë e prodhimit dhe tha se Gjermania ishte “goditur veçanërisht rëndë” nga goditjet e çmimeve të energjisë të lidhura me luftën në Ukrainë.
Kështu bën të ditur agjencia franceze “AFP”.
Përpjekjet e Bankës Qendrore Evropiane (BQE) për të zbutur inflacionin nëpërmjet rritjes së normave të interesit kontribuan gjithashtu në ngadalësimin në Eurozonë, shtoi raporti, disa ditë përpara mbledhjes së BQE-së për të vendosur nëse do të rrisë sërish kostot e huamarrjes ose do të ndalojë fushatën e saj.
Fondi Monetar Ndërkombëtar (FMN) kishte parashikuar tashmë se Gjermania do të ishte e vetmja ekonomi e madhe e përparuar që do të tkurret në vitin 2023.
Rritja në eurozonë dhe në Bashkimin Evropian në tërësi do të vazhdojë, por do të jetë më e ulët se sa ishte parashikuar në fillim të këtij viti.
Në maj, komisioni tha se eurozona do të rritet me 1.1 për qind në 2023 – por e rishikoi atë të hënën në 0.8 për qind.
Komisioni në raportin e tij tha se do të kishte “ngadalësim të aktivitetit ekonomik në verë dhe muajt në vijim, me dobësi të vazhdueshme në industri dhe zbehje të vrullit në shërbime, pavarësisht një sezoni të fortë turistik në shumë pjesë të Evropës”.
Evropa gjithashtu nuk do të jetë në gjendje të “gjejë mbështetje të fortë” nga eksportet mes rritjes dhe kërkesës së dobët globale.
Të dhënat e zymta gjermane nxitën një kopertinë të “The Economist” në gusht që pyeti: “A është Gjermania sërish njeriu i sëmurë i Evropës?”
Komisioni vuri gjithashtu në dukje rritjen e përsëritur të normave të interesit nga BQE-ja, e cila mblidhet të enjten, si një ndikim në ekonomi.
Parashikimi i rritjes për 27 vendet e BE-së në tërësi u ul gjithashtu për vitin 2023 në 0.8 për qind, nga një parashikim i mëparshëm prej rreth 1 për qind.
Zona e monedhës së përbashkët e përbërë nga 20 vende do të rritet me 1.3 për qind në vitin 2024, tha Komisioni, nga një parashikim i mëparshëm prej 1.6 për qind.
Rritja e BE-së do të jetë dukshëm më e mirë në 1.4 për qind vitin e ardhshëm.
Objektivi zyrtar i BQE-së për inflacionin është 2 për qind.
Çmimet e konsumit në eurozonë pritet të bien përsëri në 2.9 për qind në vitin 2024, një rritje e lehtë nga një parashikim prej 2.8 për qind i bërë në maj për vitin e ardhshëm.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
