Inteligjenca ukrainase ka zhvendosur dosjet dhe pajisjet e ndjeshme nga selia e saj në kryeqytet.
Ato janë transportuar drejt vendeve të sigurta në perëndim të Ukrainës.
Ky lajm u raportua nga e përditshmja amerikane “Washington Post”.
Presidenti i Ukrainës, Volodymyr Zelensky dhe ekipi i tij nuk e kanë përjashtuar mundësinë e pushtimit nga Rusia.
Vendi po merr dërgesa armësh dhe ndihmë ushtarake nga aleatët perëndimorë. Vullnetarët po stërviten për të luftuar në rrugët e Kiev-it.
Por zyrtarët perëndimorë janë të shqetësuar nga skepticizmi publik i Zelensky-t.
Shumë e perceptojnë si mungesë përqëndrimi nga ana e tij.
“Ka një ndarje midis këshilltarëve të tij administrativë dhe asaj që ai mund të dëgjojë nga shërbimet e tij ushtarake dhe inteligjente”, tha një zyrtar i qeverisë amerikane.
Sipas tij, Zelensky dhe ekipi i tij politik po punojnë nga grupi i tyre i prioriteteve dhe nuk përputhen domosdoshmërisht me ato të inteligjencës dhe ushtrisë.
“Siç kemi raportuar më herët, tani ka shumë agjentë të inteligjencës ruse në Ukrainë”, tha sekretari i Përgjithshëm i NATO-s, Jens Stoltenberg.
Duke komentuar situatën pranë kufirit ukrainas, zyrtari shprehu shqetësimin e tij dhe pohoi se ekziston një kërcënim real i pushtimit rus në Ukrainë.
“Përveç vendosjes së forcave pranë kufijve, ka një sasi të konsiderueshme të inteligjencës ruse në Ukrainë. Moska përdor mënyra të ndryshme, duke u përpjekur të diskreditojë qeverinë ukrainase”, theksoi Stoltenberg për gjermanen “Spiegel”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
