Inflacioni i ushqimeve në vendet e pasura të botës bie në nivelet para luftës në Ukrainë

Çmimet e ushqimeve në vendet më të pasura të botës u rritën në shkurt me ritmin më të ngadaltë që para pushtimit rus të Ukrainës, sipas shifrave që tregojnë lehtësimin e presioneve inflacioniste.

Organizata për Bashkëpunim dhe Zhvillim Ekonomik (OECD) tha se inflacioni i ushqimeve ra për të 15-in muaj radhazi në 38 vendet anëtare nga 6.3% në janar në 5.3% në shkurt.

Masa e përgjithshme e inflacionit, indeksi i çmimeve të konsumit, ishte i qëndrueshëm në 5.7%, sipas OECD, pavarësisht rënieve në tre të katërtat e vendeve anëtare.

Dhe se rëniet më të mëdha mujore ishin në Poloni dhe Suedi, ndërsa inflacioni ishte nën 2% në shtatë vende të OECD dhe mbeti negativ në Kosta Rika.

Megjithatë, Turqia ishte mes një grupi vendesh që pësoi një rritje të shpejtë të inflacionit të ushqimeve, e lidhur kryesisht me një rënie të monedhës vendase duke rritur koston e importeve.

Një rënie e vlerës së monedhës së saj, lirës, nënkuptonte edhe një rritje të mprehtë të çmimeve të energjisë, një çështje që preku edhe anëtarin më të ri të OECD, Kolumbinë.

OECD ka 38 anëtarë, duke përfshirë Mbretërinë e Bashkuar, SHBA, vendet më të mëdha evropiane, Meksikën, Kilin dhe Izraelin.

Në MB, çmimet për ushqimet dhe pijet joalkoolike ishin pak më poshtë mesatares së OECD-së, duke u rritur me 5% deri në shkurt.

Kjo rritje ishte më e ulëta që nga fillimi i vitit 2022 dhe nën nivelin më të lartë të 45 viteve prej 19.2% në mars 2023.

Inflacioni bazë i OECD, i cili përjashton çmimet e ushqimeve dhe energjisë, vazhdoi të bjerë, por mbeti i lartë në 6.4%, duke reflektuar çmimet e qëndrueshme të shërbimeve.

Inflacioni ra më ndjeshëm në eurozonë dhe në SHBA, ku rritja e çmimeve të energjisë dhe ushqimeve është ftohur në mënyrë dramatike.

Indeksi i harmonizuar i çmimeve të konsumit në eurozonë, i cili përdoret për të krahasuar inflacionin në vende të ndryshme, ra në 2.6% në shkurt krahasuar me 2.8% në janar.

Analistët parashikojnë se bankat qendrore do të bëjnë disa ulje të normave të interesit këtë vit në përgjigje të rënies së inflacionit, por janë bërë më të kujdesshme javët e fundit në lidhje me shkallën e çdo uljeje.

OECD tha se në vendet e mbuluara nga G20, që përfshin Arabinë Saudite dhe Brazilin, inflacioni nga viti në vit u rrit në 6.9% në shkurt krahasuar me 6.4% në janar, duke arritur nivelin më të lartë që nga marsi 2023.

“Kjo rritje u nxit pjesërisht nga një rritje e inflacionit total në Kinë, i cili u kthye pozitiv për herë të parë që nga gushti 2023. Inflacioni total u rrit gjithashtu në Arabinë Saudite dhe Indonezi dhe u hodh edhe më tej në Argjentinë. Ai ishte gjerësisht i qëndrueshëm në Brazil dhe Afrikën e Jugut”, sipas OECD.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.