Kollitja është një refleks mbrojtës që shërben për të pastruar rrugët e frymëmarrjes nga sekrecionet apo materialet e thithura, si smogu apo mikrobet.
Në shumicën dërrmuese të rasteve kalon brenda tre javësh.
Por ka forma të kollës që zgjasin më shumë se tetë javë, ndryshe të quajtura forma kronike dhe që kërkojnë verifikimin e shkaqeve.
Ka pacientë që raportojnë një kollë që ka zgjatur me muaj, por mund të mos bëhet fjalë për forma të rënda kronike, por për episode akute që përsëriten për shkak të ekspozimit të vazhdueshëm ndaj mikrobeve në dimër.
Kolla akute, nëse fillimisht është e thatë dhe pas disa ditësh e rëndë dhe shoqërohet me simptoma të ftohjes, zakonisht shkaktohet nga viruset respiratore.
Laringiti është patologjia më e shpeshtë e frymëmarrjes në dimër, e shkaktuar nga infeksionet virale: një nga simptomat tipike është një kollë që i ngjan zhurmës së fokës ose lehjes së qenit.
Kolla kronike , nga ana tjetër, mund të jetë e llojeve të ndryshme:
Kolla e thatë shfaqet pas një ftohjeje ose përpjekjeje fizike. Shpesh shoqërohet me shenja të predispozicionit alergjik dhe mund të jetë për shkak të inflamacionit kronik të rrugëve të frymëmarrjes me natyrë alergjike ose pasojë e astmës/
Kolla gërvishtëse është ajo që zhduket gjatë gjumit dhe mund të jetë me origjinë psikologjike.
Kolla katarale mund të vijë si pasojë e infeksioneve të vazhdueshme pulmonare. Ndërsa kolla e thatë që përkeqësohet kur jeni shtrirë mund të tregojë refluks gastroezofageal.
Astma është një sëmundje shumë e shpeshtë, e cila është në rritje për shkak të ndotjes atmosferike dhe shumëfishimit të alergjive, por që ende nënvlerësohet dhe shpeshherë nuk njihet dhe trajtohet saktë.
Ndonjëherë një kollë pa ndonjë shkak të dukshëm që ka zgjatur për javë të tëra mund të jetë shenja e parë e një forme të lehtë, por të panjohur të astmës.
Simptomat e astmës mund të jenë shumë mashtruese dhe ndryshojnë me kalimin e kohës: një moment shqetësimet mund të ndihen, disa minuta më vonë zhduken.
Ka shumë pak ndërhyrje vërtet të dobishme dhe efektive për kollën.
Nëse kolla është e rastësishme, është më mirë të mos abuzoni me shurupet e zakonshme. Kollitja është një refleks mbrojtës, kështu që medikamentet për ta bllokuar duhet të përdoren vetëm me këshilla mjekësore.
Duke pasur parasysh këtë premisë, në shumicën e rasteve kolla shkaktohet nga një ftohje me origjinë virale, antibiotikët janë krejtësisht të padobishëm.
Në vend të kësaj, duke pasur parasysh se një ftohje përfshin një shkarkim të mukusit nga hunda në fyt, e cila gjeneron refleksin e kollës, heqja e mukusit është një metodë efektive.
Mund të bëhet me larje hundore , me inhalime me avull pa shtuar substanca që mund të irritojnë ose duke pirë shumë lëngje për të parandaluar trashjen e gëlbazës.
Për të luftuar refleksin e kollës, rekomandohen pije të nxehta (për shembull qumësht me mjaltë), të cilat kanë një efekt zbutës.
Vizita këshillohet në rast të kollës së vazhdueshme që zgjat shumë ditë, për të penguar aktivitetet normale të përditshme, ose në rast të temperaturës.
Marrë nga “Corriere della Sera”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
