Blinken letër Xhaçkës: Vlerësim dhe besim për partneritetin me Shqipërinë

“E dashur zonja ministre. Në emër të Departamentit të Shtetit, dëshiroj t’i shpreh mirënjohjen tonë më të thellë Republikës së Shqipërisë që ishte vendi i parë që ofroi një “parajsë të sigurt” për afganët e rrezikuar dhe për zemërgjerësinë e kurajën që kanë treguar njerëzit tuaj gjatë operacioneve të NATO-s në Afganistan”.

Kështu nis letra e Sekretarit amerikan të Shtetit, Antony Blinken, për ministren shqiptare për Evropën dhe Punët e Jashtme, Olta Xhaçka, në shenjë falënderimi dhe vlerësimi për partneritetin e Shqipërisë me aleatin më të madh në botë, SHBA-të.

Në veçanti, Blinken e ka falënderuar Xhaçkën, për ndërhyrjen e saj të fuqishme në Ministerialin e 20 gushtit.

Blinken, në letër, thekson se Shqipëria e ka treguar edhe një herë, përkushtimin ndaj NATO-s. Kjo, duke kontribuuar me kapacitete njerëzore dhe ushtarake në Afganistan. Plot 4 mijë trupa, janë dislokuar aty në dy dekada qëndrim të amerikanëve.

Sipas kryediplomatit amerikan, investimi i Shqipërisë në sigurinë dhe prosperitetin e popullit afgan, ka ndihmuar shumë në avancimin e synimeve të të dy vendeve. Sakaq, evakuimi i afganëve dhe zhvendosja e tyre e mëpasshme, ende vazhdon.

Një tjetër aspekt i mirënjohjes amerikane për Shqipërinë, ka shkuar edhe për kontributin me personel në objektin e Bektel në Kosovë.

Ndërsa, ravijëzohet fakti se trupat shqiptare, ndihmuan në krijimin e një ambienti të qëndrueshëm dhe të sigurt për forcat amerikane dhe për popullin afgan.

“Prania e tyre ka bërë të mundur që Aleanca e NATO-s të kryejë operacionet e saj, tu mundësojë vajzave të reja ndjekjen e shkollës si dhe kanë bërë më të sigurt jetën e përditshme për shumë afganë”, shkruan Blinken.

Teksa në mbyllje, ai ka vlerësuar plotësisht marrëdhënien mes dy shteteve.

“Shtetet e Bashkuara vlerësojnë thellë marrëdhënien tonë të ngushtë me Shqipërinë dhe mbetemi besimplotë në vazhdimin e këtij partneriteti strategjik për avancimin e interesave tona të përbashkëta”, përmbyllet letra.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.