Autoritetet kanë arrestuar të dielën e 19 qershorit regjisorin Paul Haggis – i cili fitoi Çmimin Oscar-in – në lidhje me akuzat se ai kishte sulmuar seksualisht një grua në Italinë Jugore.
Kështu kanë raportuar mediat italiane të lajmeve, duke cituar prokurorët vendas.
Haggis me origjinë kanadeze, 69 vjeç, ka qenë në Itali për një festival filmi, i cili fillon të martën në Ostuni, qytet turistik në Puglia.
Një avokat i Haggis, Priya Chaudhry, lëshoi një deklaratë, ku thuhej se regjisori ishte “krejtësisht i pafajshëm”.
Një deklaratë nga festivali i filmit për gazetën Variety tha se organizatorët “e kishin mësuar me shqetësim dhe tronditje lajmin se Paul Haggis është në paraburgim për dhunë të dyshuar”.
Haggis është regjisor, producent dhe skenarist.
Ai fitoi një Oscar në vitin 2006 për skenarin më të mirë origjinal për “Crash”.
Më pas shkroi skenarët për “Million Dollar Baby”, këstet e “James Bond Quantum of Solace” dhe “Casino Royale”, si dhe regjinë e “In the Valley of Elah” dhe “The Next Three Days”.
Ai ishte më parë një “Scientologist” i shquar dhe ka shkruar për procesin e tij të arratisjes nga organizata.
Agjencia e lajmeve “LaPresse” dhe disa media të tjera italiane përcollën një deklaratë me shkrim nga prokurorët në qytetin e afërt të Brindisi-t se po hetonin akuzat që përfshinin një “grua të re të huaj”, e cila u detyrua të kishte marrëdhënie seksuale “jo konsensuale” gjatë dy ditëve.
Prokurorët Antonio Negro dhe Livia Orlando, të cilët po kryejnë hetimet, deklaruan se gruaja ishte “detyruar të kërkonte kujdes mjekësor” pas marrëdhënieve seksuale.
Pas nja dy ditësh “marrëdhëniesh jo konsensuale, gruaja u shoqërua nga burri” në aeroportin e Brindisi-t të dielën dhe “u la në agim, pavarësisht kushteve të pasigurta fizike dhe psikologjike”.
Zyra e prokurorit të Brindisi-t thuhet se u mbyll të dielën. Avokati i Haggis nuk iu përgjigj menjëherë kërkesës së agjencive të lajmeve për koment.
Prokurorët thanë se stafi i aeroportit dhe policia e vunë re “gjendjen e saj të konfuzuar” dhe – pas trajtimit fillestar – e çuan në selinë e policisë së Brindisi-t.
Oficerët atje e shoqëruan atë në një spital lokal për ekzaminim.
Nuk ishte menjëherë e qartë nëse Haggis po mbahej në stacionin e policisë, në një hotel apo akomodim tjetër.
Prokurorët italianë gjithashtu u cituan të kenë thënë se gruaja “formalizoi ankesën e saj dhe citoi rrethana, të cilat u shikuan më pas për konfirmim nga hetuesit”.
Ata nuk cituan kombësinë, apo moshën e saj.
Paul Haggis u akuzua më parë në SHBA për sjellje të pahijshme seksuale nga katër gra, duke përfshirë dy akuza për përdhunim, në vitin 2018.
Në atë rast, i cili ende nuk ka ardhur në gjykatë, regjisori fillimisht ishte subjekt i një padie nga një publicist që pretendoi se përdhunoi. Tri gra të tjera kanë dalë me akuza.
Publicisti Haleigh Breest akuzoi Haggis për “një rast tronditës dhe skandaloz të përdhunimit dhe sulmit seksual” që ndodhi në vitin 2013. Haggis ngriti një kundërpadi duke pretenduar se padia ishte “zhvatje”, një përpjekje prej 9 milionë dollarësh për të marrë para prej tij.
Tre akuzueset e mëvonshëm nuk kanë bërë të ditur identitetin e tyre.
Ekipi ligjor i Haggis mohoi çdo akuzë, duke argumentuar se “ai nuk përdhunoi askënd”.
Në një intervistë me median britanike “The Guardian” në lidhje me ngacmimet seksuale në Hollywood, Haggis e quajti atë si një qytet “mjaft seksist”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
