Revista e famshme amerikane, “Variety”, ka publikuar disa artikuj ndër muaj, duke promovuar filmin boshnjak “Quo Vadis, Aida?”, duke i dhënë një vlerësim të lartë dhe duke e lakuar si një prepotent për triumf të një çmimi Oscar.
Pos, revistës “Variety”, për këtë film ka folur edhe ish-sekretarja e Shteteve të Bashkuara të Amerikës, Hillary Clinton, e cila mes të tjerash, ka rekomanduar që ky film të shikohet nga audienca sepse trajton një temë të ndjeshme, atë të ngjarjes së gjenocidit të zhvilluar në Srebrenicë.
Por, promovimi i vazhdueshëm i filmit nga mediat dhe personalitetet e njohura amerikane, duket të mos iu ketë pëlqyer mediave serbe.
Njëra ndër gazetat më të lexuara serbe, e përditshmja, Novosti, ka publikuar një artikull brenda së cilit, këtë promovim të bujshëm, e ka quajtur “propagandë myslimane të shtypit amerikan, kundër Serbisë”.
Novosti, ka shkruar se – “shtypi amerikan po imponon këtë film për tu shpërblyer me një çmim Oscar, dhe se filmi le dilemë për diskutim, pasi që aty paraqitet një ushtar serb, i cili prezantohet në kërkim të një delegacioni mysliman nga Srebrenica, ndërsa brenda filmit shfaqen skena teksa ai prek një grua përfundri veshjes së saj”.
Gazeta serbe tutje shkruan se – “ në arkivat origjinale, ekzistojnë fakte të cilat shfaqin ushtarët serbë që e lejojnë gruan nga delegacioni që të hyjë brenda”.
For anyone catching up on their Oscars viewing this weekend, I'd recommend "Quo Vadis, Aida." Telling the story of the Srebrenica massacre through one woman's race to save her family, it's an unsparing look at how genocidal violence happens. https://t.co/McUpggcmPd
— Hillary Clinton (@HillaryClinton) April 23, 2021
Shtypit serb, përshtypje i ka bërë edhe postimi i ish-sekretares së shtetit, Hillary Clinton, duke e gjykuar edhe atë si pjesë të propagandës amerikane.
Ndryshe, “Quo Vadis, Aida?”, në fokus ka përvojën e grave, të cilat gjatë gjenocidit të Srebrenicës të zhvilluar në vitin 1995, dhe nga kritikët e filmit është cilësuar si një dramë e fuqishme me të cilën Bosnja dhe Hercegovina do të përfaqësohet në kategorinë “Filmi më i mirë ndërkombëtar me metrazh të gjatë”, në ceremoninë prestigjioze të ndarjes së çmimeve “Oscar”.
Filmi artistik flet për një grua boshnjake të quajtur Aida (rol i luajtur nga Jasna Djuriciç), një përkthyese për Kombet e Bashkuara në Srebrenicë, e cila përpiqet të shpëtojë familjen e saj pas rënies të qytetit në korrik të vitit 1995, nga forcat e udhëhequra nën komandën e gjeneralit serb të Bosnjës, Ratko Mlladiç (rol i luajtur nga Boris Isakoviç).
Historia shpaloset në vitin e katërt të armiqësive, katër muaj pasi lideri politik serb i Bosnjës, Radovan Karaxhiç nënshkroi të ashtuquajturën “Direktiva 7”, e cila urdhëroi trupat e tij “të krijonin një situatë të padurueshme pasigurie totale, pa shpresë për mbijetesë ose jetë të mëtejshme për banorët e Srebrenicës ose Zepës”.
Direktiva u realizua me Operacionin “Krivaja ‘95” të Ushtrisë Serbe të Bosnjës, i cili përfundoi në masakrimin e më shumë se 7,000 burrave dhe djemve boshnjakë nga Srebrenica.
Shumë filma janë përqendruar te lufta në Bosnjë dhe Hercegovinë, por “Quo Vadis, Aida?”, është filmi i parë me metrazh të gjatë që trajton gjenocidin e Srebrenicës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
