Suedia, me sistemin bujar të mirëqenies dhe bollëkun e energjisë së gjelbër, teorikisht duhet të jetë e pajisur më mirë se shumica e vendeve evropiane për të përballuar një goditje nga kriza e kostos së jetesës.
Për sa i përket PBB-së për frymë, është shteti i pestë më i pasur anëtar i BE-së.
Gazi natyror përbën vetëm dy për qind të energjisë, duke e izoluar atë nga shkatërrimet më të këqija ekonomike të luftës së Rusisë kundër Ukrainës.
Kurse varfëria është shumë nën mesataren evropiane.
Por rritja e shpejtë e faturave të energjisë elektrike dhe e inflacionit të çmimeve të ushqimeve po e dëmtojnë atë si kudo tjetër.
“Edhe Suedia ka një problem varfërie. Mund të mos flasim shumë për këtë, por është aty dhe është përkeqësuar këtë vit”, ka thënë Johan Rindevall.
39-vjeçari, ish-punonjës i industrisë së teknologjisë, drejton Matmissionen, një zinxhir unik supermarketesh në Suedi që është zgjeruar me shpejtësi që nga janari.
Tetë dyqanet e Matmissionen shesin ushqime të dhuruara nga prodhuesit dhe shitësit me pakicë që rrezikohen të shpërdorohen.
Qëllimi i organizatës është i trefishtë: të kufizojë mbetjet ushqimore, të trajnojë punëtorët e rinj dhe të shesin ushqime me çmime të ulëta për njerëzit që kanë nevojë.
Po ashtu të ardhurat ndihmojnë në subvencionimin e një operacioni të veçantë të bankës ushqimore me disa donacione të shpërndara për OJQ-të që punojnë me ata në nevojë.
Çdokush mund të blejë në Matmissionen, por vetëm anëtarët e regjistruar, të cilët duhet të rezervojnë një vend për të blerë, marrin çmimet më të ulëta.
Anëtarësimi është i hapur për ata me të ardhura mujore më pak se 880 paund.
Sistemi i mirëqenies suedeze është shkurtuar në mënyrë të vazhdueshme vitet e fundit, duke zgjeruar hendekun midis të pasurve dhe të varfërve.
Gjithashtu duke lënë gjithnjë e më shumë njerëz të prekshëm ndaj inflacionit që ka arritur mesatarisht rreth 8% këtë vjeshtë.
Të ardhurat e familjeve janë goditur edhe nga faturat e energjisë elektrike që në disa raste janë dyfishuar.
Më shumë se 75 për qind e energjisë elektrike të Suedisë vjen nga hidrocentralet, por ajo nuk i ka shpëtuar ndikimeve të çmimit të energjisë.
Çmimet e benzinës dhe ushqimeve janë rritur gjithashtu.
Rindevall ka treguar se 90 deri në 95 për qind e blerjeve bëhen nga anëtarët, të cilët mund të blejnë deri në 300 korona ushqim në javë me çmimin e anëtarësimit.
Pak anëtarë janë të uritur, por shumë nuk janë në gjendje të përballojnë një dietë të ekuilibruar: shumë karbohidrate, pak proteina, pak perime.
Sipas tij, anëtarësimi i Matmissionen u rrit nga 7 mijë e 200 në janar në më shumë se 14 mijë e 700 deri në fund të tetorit.
Grupi më i madh i të ardhurve, rreth 40 për qind, janë familjet me fëmijë, prindër të vetëm dhe çifte.
“Inflacioni në këto ritme do të thotë që ne po shohim shumë, shumë më shumë njerëz se kurrë më parë. Disa kanë filluar të vijnë duke thënë se nuk kualifikohen si anëtarë, por nuk mund të përballojnë të blejnë ushqimin që u nevojitet diku tjetër”, ka thënë ai.
Kështu, Matmissionen po harton plane zgjerimi për dyqane të reja në të gjithë vendin.
“E vetmja gjë pozitive në gjithë këtë është se tani kaq shumë njerëz po flasin për çmime të pamundura të ushqimit, saqë nuk ka më të njëjtin stigmë për të mos qenë në gjendje të përballoni për të ushqyer familjen tuaj. Nuk është më një tabu”, ka theksuar ai.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
