Të paktën 46 gra janë vrarë – disa prej tyre janë djegur për vdekje – pas një shpërthimi të dhunës mes bandave në një burg në Honduras.
Autoritetet gjetën dhjetëra trupa pas dhunës në burgun në Tamara, rreth 30 milje në veri-perëndim të kryeqytetit të Hondurasit, Tegucigalpa.
Kështu ka bërë me dije Yuri Mora, zëdhënëse e agjencisë kombëtare të hetimit të policisë.
Disa nga viktimat ishin qëlluar për vdekje dhe të paktën shtatë të burgosura po trajtohen në një spital në Tegucigalpa për plagë me armë zjarri dhe thikë, sipas punonjësve atje.
Presidentja Xiomara Castro tha se ishte e tronditur nga ajo që ajo e përshkroi si “vrasja monstruoze” e grave, për të cilën fajësoi bandat e fuqishme të rrugës.
“Solidaritet me familjet”, ka shkruar ajo në një postim në Twitter, duke shtuar se do të përgjigjet me “masa drastike”.
Delma Ordóñez, presidentja e një shoqate për familjet e të burgosuarve, tha se një përleshje kishte shpërthyer në burg midis anëtarëve të bandave rivale Barrio 18 dhe Mara Salvatrucha (MS-13).
Të afërmit e të burgosurave u mblodhën jashtë burgut, duke kërkuar të mësojnë për to.
“Po kërkoj informacion për atë që ka ndodhur me vajzën time, por ende nuk na kanë informuar”, tha një grua.
Julissa Villanueva, drejtuese e sistemit të burgjeve të vendit, sugjeroi se trazirat nisën për shkak të përpjekjeve të fundit nga autoritetet për të goditur aktivitetin e paligjshëm brenda burgjeve.
Ajo e cilësoi dhunën si rezultat të veprimeve që po ndërmerren kundër krimit të organizuar.
Bandat shpesh kanë kontroll të gjerë brenda burgjeve të vendit, ku të burgosurit shpesh vendosin rregullat e tyre dhe shesin mallra të ndaluara.
Trazirat duket të jenë tragjedia më e rëndë në një qendër paraburgimi grash në rajon që nga viti 2017, kur vajzat në një strehë për të rinjtë me probleme në Guatemalë u vunë zjarrin dyshekëve për të protestuar ndaj përdhunimeve dhe keqtrajtimit në institucionin e mbipopulluar keq.
Tymi dhe zjarri që pasuan vranë 41 vajza.
Fatkeqësia më e keqe e burgut në një shekull ndodhi gjithashtu në Honduras, në vitin 2012 në burgun Comayagua, ku 361 të burgosur vdiqën në një zjarr.
Shumica e viktimave nuk ishin akuzuar apo dënuar për ndonjë krim.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
