Spanja regjistroi temperatura rekord këtë javë dhe zonat e Alpeve italiane parashikohet të arrijnë deri në 15 gradë Celsius mbi mesataren sezonale në ditët në vijim, pasi pjesa më e madhe e Evropës po përjeton një fillim anomalisht të ngrohtë të vitit të ri.
Në Bilbao, në veri të Spanjës, temperaturat arritën në 24.7 gradë Celsius, një nivel i lartë që nuk është parë që nga fillimi i mbajtjes së të dhënave në vitin 1947.
Në Segovia, afër Madridit, u regjistruan 22.7 gradë Celsius, më i larti që nga viti 1920, dhe Avila aty pranë arriti 20.2 gradë Celsius, më i larti që nga viti 1983 .
“Këto temperatura të larta nuk janë normale”, tha Rubén del Campo, një zëdhënës i agjencisë shtetërore meteorologjike ‘’AEMET’’. “Këto janë temperatura që normalisht do t’i shihni në muajin prill”.
Ai ia atribuoi nxehtësinë e fundvitit një mase ajri të nxehtë mbi Spanjë të kombinuar me presionin e lartë.
“Është një fenomen normal që ne e shohim, por ajo që është e çuditshme këtë herë janë temperaturat e larta”.
Shkencëtarët kanë parashikuar prej kohësh se kriza klimatike dhe ngrohja globale do të çonin në mot më të shpeshtë ekstrem, megjithëse ngjarjet ekstreme të rastësishme ndodhin natyrshëm.
Anticikloni i presionit të lartë është zhvendosur në Francë dhe Itali dhe shpëtimtarët alpinë kanë paralajmëruar rrezikun e ortekëve.
Luca Mercalli, një meteorolog, tha se, “për momentin është rreth 15 gradë Celsius në zonat e Alpeve në një lartësi prej 1 mijë e 600 metrash dhe nuk po godet zero nën 4 mijë metra. Nuk ka bërë as ngrirje gjatë natës – temperatura nuk ka rënë nën dhjetë gradë, dhe kjo është shumë e pazakontë”.
Temperaturat në disa nga vendpushimet më të njohura të skive të Italisë, duke përfshirë Cortina d’Ampezzo dhe Courmayeur, parashikohen të jenë 13-15 gradë Celsius mbi normën sezonale në ditën e Vitit të Ri dhe moti i qetë pritet të qëndrojë deri më 3 janar.
Vendpushimet e skive në një lartësi deri në 2 mijë metra janë pa borë. “Ata nuk mund të prodhojnë borë artificiale pasi temperatura është shumë e ngrohtë”, tha Mercalli.
Shërbimi i shpëtimit alpin i Italisë ka këshilluar skiatorët që të kontrollojnë rregullisht buletinet e motit për shkak të rrezikut të ortekëve.
“Temperatura e ngritur e kombinuar me erërat e forta krijojnë kushtet për ortekë”, tha Mercalli.
Pjesa tjetër e Italisë po përjeton gjithashtu kushte jashtëzakonisht të ngrohta, me një temperaturë maksimale prej 18 gradë Celsius që pritet në Romë të shtunën dhe 22 gradë Celsius në qytetin sicilian të Catania-s nga mesi i javës së ardhshme.
Në Spanjë, temperaturat e larta mbyllën një vit që filloi me një stuhi vdekjeprurëse dëbore që mbuloi pjesë të mëdha të vendit në dëborë dhe e solli Madridin në një ndalesë.
“Ka qenë një vit ekstremesh”, tha Del Campo, kjo pasi stuhia e borës bëri që disa komuna atje të përballen me temperatura deri në -25 gradë Celsius, ndërsa ditë më vonë qyteti bregdetar i Alicante arriti në 30 gradë Celsius.
Italia përjetoi gjithashtu ngjarje ekstreme të motit në vitin 2021, me Siracusa-n në Sicily që besohet se ka thyer rekordin evropian për temperaturën më të lartë, duke arritur në 48.8 gradë Celsius në gusht.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
